Dicht’n aover oew moerstaal?
Kan ut anno noe nog?
’t Is misschien niet meer van disse tied
Maar ik doe ut toch

De eerste zinn’n en woord’n
Leerd’n ik van mien mo
Onder ut jappel schell’n of neijster’n
Leerd’n ik de Achterhoekse ‘o’

As de varkens wed’n evoerd
steurig stiefel’n ik achter eur an
aerbaez’n plukk’n, wasse ophang’n
Praot’n, praot’n, de hele dag vedan

Mien breurs en zuss’n ging’n naor schole
Die bunt een paar jaor older
Ik leep praotend achter mien mo an
Van de kelder tot de zolder

Wiele ging niet naor de kleuterschole
De eerste vief jaor bleef ie thuus
Klokke kiek’n, veters strikk’n en praot’n
Wiele leern alles in huus

Mien va was dur natuurlijk ok
Hee praot’n ok wel heur
En hee las alle daag’n nao ‘t ett’n
Un stukske uut de biebel veur

Daornao weer tied um naor ’t land te gaon
Kump daor vaderland vandan?
Dan is de moerstaal van mien mo
Zee leerd’n mie da’k praot’n kan!