“Nao een dreuge afgang van veurig jaor
maakt wiele de bult dit jaor wel weer klaor!”
Zo steet ut op Facebook te laezen
Daor zolt er wel wat druk mee waezen

Ut idee ontstond ruum twee jaor geleed’n
Argens in ut buut’ngebied in een keet
Een koppel jongeluu zat bie mekare
Ie weet wel hoe dat geet

Een potje bier, een betjen ouwehoeren
Praoten aover dit en praoten aover dat
Allemaol bes gezellig
Maar dur ontbrak nog wat

Dur was gien paosvuur meer in Almen
De organisatie was dur met estopt
Zo ontstond in Keet Deurloos ut idee
En werd dur bie Umgrove op deure eklopt

Op de kamp an de Whemerweg
Daor mog de baoke wel staon
Veur de vergunninganvraoge
Eff’n langs ut gemeentehuus gaon

Een tente en stikstofberaekening
Heupe formulieren mossen innevuld
En toen bossen sneujholt en takken
Alles stapeln tot een grote bult

Eerste Paosdag as een lopend vuurtje
Met muziekvereniging Juliana veurop
Daorachter de kinder met fakkels
In een lange riege ut bouwland op

Al die mensen maakt uut zichzelf een kringe
zonder afzetlint of hekken
De kinder wacht rustig op een seintje
Tot ze de baoke an meugt stekken

Ut olde holt wodt opperuumd
Dur komt nieuwe loten an de stam
En zo zet de jongeluu met ut paosvuur
Almen weer in vuur in vlam