’t Is Sinterklaosaovond
De wind weijt umme ’t huus
Mooder hef speculaas ebakkn
De chocolademelk steet op ’t fornuus

De kinder hebt een wottel epakt
Met wat heui veur ’t peerd
En zit noe gespann’n te wachtn
In de kamer bie de heerd

Kiek, de maone schient
Buut’n deur de boom’n
Maar de grote vraoge is
Zol Sinterklaos wel koom’m?

De schoen’n staot bie de deure
Al bunt ze een misschien wat klein
Dur kan wel een taaipopje in
Of een varkentje van marsepein

De kinder begint te zingn
Dat Sinterklaos is annekom’m
Maar nao vieftien liedjes
Hebt ze nog niks vernom’m

Wat duurt ut wachtn lange
De klokke slût al zeuv’n keer
Is Sinterklaos ons vergettn?
Of weet hee de weg niet meer?

Dan wodt dur op de deure klopt
De peppernöttn rolt naor binn’n
Gelukkig kump va dur ok an
Sinterklaosaovond kan beginn’n